Tuesday, October 16, 2007

Zergatik irakurri klasikoak?

Hona hemen Gara egunkariaren "Mugalari" gehigarrian pasa den larunbatean Angel Erro poeta burlatarrak argitaraturiko zutabe gogoangarria, egilearen beraren with kindly permission gure blog honetara ekarria.

a) Klasikoak irakurtzeko ez dagoelako motibo beharrik.

b) Itxura guztien kontra, beraien iruzkingileak (eta apologistak) baino infinituki dibertigarriagoak direlako.

c) Haiek hori bera eginen luketelako gure alde.

d) Italo Calvinok hala esaten duelako.

e) Edizio askoz ere merkeagoetan saltzen dituztelako.

f) Ekidin ezina delako liburua filma baino hobea izatea (ikusi –eta irakurri- Troy, Obaba, Tristam Shandy).

g) Denbora eraginkorki arduratu delako iraganaren obra kaskarrak garbitzeko, ezein egileren sentsibilitatea zauritu gabe. Gaur egungo kortesiak basoak desagerraraztera eta irakurlegoa galtzera darama.

h) Elkartasunagatik. Haiek gutxiengoa dira.

i) Aukera ematen digutelako gutaz guk baino gehiago dakitela egiaztatutakoan harrituarena egiteko.

j) Gogoko dituzun egile garaikideek irakurri dituztelako, nabari zaie. Gustatzen ez zaizkizunek filma baino ez dute ikusi.

k) Irrikatan zaudelako.

l) Gure erantzukizuna ere badirelako. Haietako batzuek, izan ere, ez dute idatzi zuten hizkuntzako hiztunik. Euskaldunok harekiko sentiberak izan behar dugu.

m) Dagoeneko irakurri dituzulako.

n) Aquí hay tomate, Gran Hermano eta horrelako telebista programetan gaurkotasunaz, errudun sentitu gabe, ikasi ahal izateko, betikotasuna Gilgamesh-en poema bezalakoekin lortuta baduzulako.

o) Apurtzailea hitza zure literatur hiztegitik ezabatzeko.

p) Zeren, bestela, zertaz mintzatuko gara bulgariar edo japoniar batekin Euskal Herriaren gorabeherak azaldu dizkiogun ondoren?

q) Aspergarrien klubean sartuta dibertitzeagatik.

r) Badaezpada hemendik urte batzuetara deskubritzen duten edertasuna existitzen zela.

s) Garraio publikoetan ez nabarmentzeagatik. Paradoxikoa dirudi baina destainaz begiratzen zaituzte Moby Dick edo Romeo eta Julieta irakurtzen ikusten zaituztenean, abenturazko edo amodiozko nobela soil bat irakurtzen ari bazina bezala, izan ere, horixe ari baitzara egiten.

Eta nik gehituko nuke: zergatik irakurri klasikoak? Hargatik.

Friday, September 21, 2007

Monday, August 20, 2007

Euskarazko poesia in english

Six Basque poets liburu berria Gales-eko Arc argitaldariaren eskutik, ingelesez ere euskal poesia gozatzeko aukera. Albiste osoa BERRIAn.
Kirmen Uribek dioenez, "gure herria, txikiegia agian..." Agian.

Tuesday, August 7, 2007

Irazokiri elkarrizketa luzea BERRIAn

BERRIA egunkariaren kultur atala mamitsua izaten da oso. Oraingoan, Francisco Javier Irazokiri elkarrizketatu dute, Hiperion-en eskutik iaz atera zuen "Los Hombres Intermitentes" liburuaren harira.
"Paris-tik natorren artista bat naiz ni" Lesakatik datorren eta Parisen bizi den artista interesgarri horren azken lana duzue liburu hori.
Nik prosa poetiko -edo poesia prosaiko- liburu hori udan honetan irakurri dut eta gomendagarria da, baita Fernando Aranburuk Lippstadt-etik idatzitako sarrera ere.

Tuesday, July 17, 2007

poesiaegunak.net

Emakumea eta poesiari buruzko jardunaldia EA herrian http://www.poesiaegunak.net/
uztail honetan Bizkaiko herri zoragari horretan.

Thursday, June 28, 2007

Argazki bilduma

Agoitzeko biltzarrean eginiko argazkiak Interneten, denon eskura.
Ea beste baten batek eransten dituen beste batzuk...

Sunday, June 10, 2007

Shakespeare-ren sonetoa

Shakespeare-ren soneto hura, Agoizko Kultur Etxean gozatu izan ez genuena.
Shakespeare-ren soneto hura, Angel Errok Iruñeko kafetegi batean ahantzia utzi zuena.
Eta, last but not least, Shakespeare-ren soneto hura, orain bai, Nafarroako Poesiaren II. Biltzarreko Estetika Tailerrean izan zirenetzat bereziki.

Why is my verse so barren of new pride,
so far from variation or quick change?
Why with the time do I not glance aside
to newfound methods and to compounds strange?

Why write I still all one, ever the same

and keep invention in a noted weed,

that every word doth almost tell my name,
showing their birth and where they did proceed?

O, know, sweet love, I always write of you,
and you and love are still my argument;
so all my best is dressing old words new,

spending again what is already spent:

For as the sun is daily new and old,
so is my love still telling what is told.


Juan Garziak itzuli eta atondua, Soneto hautatuak liburutik hartua

Zertaz eleok hain soin berri gabe,
beti hain lehen-antz, berdin, mudagaitz?
Zertaz ez egin atzokotik alde,
bide berri, molde bitxien bekaitz?

Zertaz ari beti honen bat elez,

solas ezagun beraren irazkin,
non hitz bakoitzak baiterizt izenez,
ozen salatuz norengandik den jin?

Zu, bada, kutun, zu zaitut gai bakar,
zutaz amodio, amodioz zu;
hitz zaharra berri, berria zahar,
besterik ez dagit, su zenetik su.

Ekia egun oroz berrit-zahart,
nik maite-erran maiz errana dakart.


Duela hamabi urte, artean guraso ez nintzela, argitaratu berria zelarik irakurri nuen estreinakoz, eta orain, hamabi urte igaro eta gero, LXXVIgarren soneto hura, berriz agertzen zait...
Finean, dena idatzita omen dago, eta beti itzultzen gara betiko gaietara, betiko poema zaharretara... Shakespeare-ren soneto hura.